Tuesday, September 27, 2005

4 more days!

再努力多四日,就可以放假,見下D好耐冇見o既朋友,見下阿Jan...
o念下都開心!

Thursday, September 22, 2005

手語

天生一隻耳仔失聰,習慣了身邊的人知道後投來奇怪的眼神,問點解,然後問,甘你遮住一隻耳咪乜都聽唔到?
走在朋友身邊,坐車,飲茶,接電話,聽headfone都只可以選單邊,甚麼是surround sound,我不知道。
習慣了,沒有尷尬,或自卑;就是習慣了。
去年還在匯豐上班的時候,由於太閒,很認真的想過去讀手語,不為甚麼偉大的理由,只怕有一天醒來,再也聽不見,也不至於太慌張。
後來發現課程貴,上課地點又遠,就打消了念頭。現在嘛,上班時間不定時,就更加不用去想。

然後發然你竟然跑去報讀了這個課程,兩隻耳仔好端端的,說著偉論,甚麼要踏入聾人的世界聆聽他們的心聲...
有點想嘔。我而家知道咩叫俾人同情。
就是一些健全得滯又好心得滯的人,叫那些不那麼健全的人學懂甚麼叫自卑。

Wednesday, September 14, 2005

六月 till now

卸下了hi-liter acting producer的工作,肩頭終於鬆了一點,心情也好了一點。
回顧過去的一個暑假,做了一大堆,真正覺得做得好的沒有幾樣。心情好的日子,也沒有幾天。
六月開始新工作,一個星期上班五天,天天也緊張得要死,怕有突發,怕稿譯得不好,怕問錯stupid questions,怕返帶返唔切,又怕聲線用錯唔夠氣,反正每天就是在神經極度繃緊的狀況下過活。
雖然這麼說,但我還是喜歡這份工作的,也許經歷適應期,就是這麼一回事吧。
在這段期間我其實需要有好好休息,讓身心有好好放鬆的時間,耐何我又唔識死,答應做Hi-Liter的acting producer,連僅餘的精神和時間也全數送上,簡直係送死。
說實在的,不多不少也有點後悔。工作量太重,責任太大,結果壓力缺堤,為自己,為其他人,也帶來難以彌補的傷害。其實應該恨心D,今次當係學個教訓,下次就識得say no.
其中一個導至我心情差(仲發癲鬧阿Jan fans!)的原因,是我發覺自己根本不能兼顧所有事情,顧此失彼,為了工作和hi-liter的事奉,逼不得已下放棄了很多跟朋友,家人,男友相處的時間,換來是失望和投訴。就這樣,每天照鏡看見不是一個好女兒/好家姐/好女友的自己,這樣的事實叫我越來越討厭自己。

其實心情一直未好過,只是比之前好了一點點,因為我知道,終於有機會補返少少,而家陪返佢地多D,希望可以挽救返少少自信。

然後發現,自信竟然要靠這種方法去挽救,實在卑鄙。

Saturday, September 10, 2005

我都唔知想點

最近好多野忙,好多野煩,心情低落,就算每日啪大量林狗同smap都無補於事。
其實阿jan出碟搞talkshow,我心情好複雜。
可以聽佢既歌係開心,買到飛睇talk show亦令我好興奮,但係我其實唔想海峰甘紅甘多人鍾意,我唔想承認有人比我更喜歡佢,或者應該甘講,我唔想知道佢appreciate其他fans,但係我一次都未同佢講過野。
其實我又唔係真係甘恨同佢講野,海峰係:只可遠觀。
但係當我知道有其他女仔話鍾意佢,然後有勇氣行埋去,仲有機會同佢講野,或者海峰對佢笑,我就會恨到入肉。係唔開心個隻恨,係會想殺人個隻恨。
係咪有D變態?
都話我心情煩燥。

Friday, September 09, 2005

只因喜歡你

等了十幾年,終於有機會睇住你郁郁下,我呢一刻既心情實在難以形容。
我想係度特別多謝M,俾我煩左甘多日,幫我買飛仲肯陪我去睇,錫晒你!!!
我和林海峰的約會,2005年10月13號見!