Saturday, June 25, 2005

點好?

今日由夜晚十二點到早上五點都有我的錄音片段喔~
即係香港下晝三點到夜晚八點,兩段唔同既錄音梅花間竹。

其實錄既時候我好緊張,表現得唔好,不過唔想阻住同事收工,佢話ok,就算我覺得唔係好ok, 都唯有將就下..
對自己有要求,但係我又覺得自己很多時候都達唔到,其實會好嬲自己,放唔開既心情就算放左工都放唔開...

有咩方法?

Friday, June 24, 2005

有得聽~~

今日終於錄到一條見得下人既track,有興趣聽既朋友請留意:
溫哥華時間六月二十四日零晨1點,3點,5點
香港時間六月二十四日下晝4點,6點,8點
(最好搭正之前少少開定啦,時差呢D野話唔埋架嘛~)
www.am1470.com 現場直播錄音片段。
其實全部都係同一條,所以是但聽一條得架喇~

請各位留D意見俾我,幫我改進下,嚴厲D鞭刷我唔怕窩~
多多指教. yoroshiku ne ^_^

Tuesday, June 21, 2005

工作情緒

工作情緒這回事我總是不太懂得掌握。
今天開始學習夜班工作,由下晝四點工作至零晨十二點。為期五天。
主要收香港和本地主流電台最新消息,準備晚間通宵播放的錄音和報整點新聞。
當然我未夠經驗自己做,只不過擔張凳仔跟係茂叔後面學下譯稿only.
越係想譯得好,越唔想被人改,就越係譯得差,被人改到花碌碌,條氣唔順,我無理由唔得,再黎過!越係驚譯唔好,就譯得更加之差,心情就一日一日變得沉重。其實呢個自然定律,我又唔係唔知,但就係揮之不去。
然後這幾個星期積下來的壓力在今天的最後一個鐘頭被全數引爆:錄一段新聞。
Bonisteel被控兩項一級謀殺案; Bonisteel被控兩項一級謀殺罪; Ray Romanetz; Ray Romanzte; Dave Bonconnier; Dave Bonconnier; CN鐵路橋樑; CM鐵路橋樑;制水;濟水;重覆重覆重覆重覆錯完又錯,個心越急,D螺絲食得越勁,開始越讀越快,然後又係Bonconnier制水! 黐線!

最後因為時間關係,我完成唔到我原本要做的功課,茂叔好好人幫我錄埋。
做左十年電台,今日我竟然錄唔掂一條5分鐘既track,空手離開錄音室!黐線!!
然後重槌一擊,腦中再次響起警號,係新聞界,我只係新丁一件。

講真,以我這樣一個新丁,真係乜都冇,如果連Attitude都輸埋,我就真係乜都帶唔走。所以我同自己講,幾挫折,幾想喊,幾不忿都好,我唔可以就甘算數!

Monday, June 20, 2005

thank you

多謝各位好友的關心,我很好,我和莫國王也好。
跌得很痛,但爬起來,路還是要繼續走。
suz講得好準,唔洗我點補充啦,我曉架啦,會學乖架啦!(笑)

第一次報新聞,下次再講!

Sunday, June 12, 2005

想放棄

好朋友幾個月前在家頁說過這樣的話:

男子都是薄情。這一秒鐘說很愛很愛你時,下一秒不愛你時卻可以若無其事地用最正常不過的言語去傷害你。

今天親身經歷,好一種震憾。
若情人變心是十級痛,我想今天我經歷了十二級痛。
一個心只可同時愛一個人,
他不愛你的時候,不一定因為他愛上別人,
當你發現他愛自己多於一切,那種冤屈很窒息。

Saturday, June 11, 2005

有點小進步

寫稿和思考整理所需的時間比上星期初有點進步,高興!

這幾天忙完教會的事情還是教會的事情,連好好坐下來寫寫父親節咭的時間也沒有。幸好妹妹找到一張收藏了十年有多,爸爸不知何時買下的怪雞咭,我們打算寄給他,一定笑死!
咭的封面有兩隻用鐵絲做彈弓支撐的鮮黃色檸檬,背後有簡單線條,裡面寫住
"酸酸的,又不會太酸,祝福"
有夠無里頭了吧?!哈哈~~我很有信心這張咭會引到佢笑!父親節適合輕鬆笑一笑!

講開咭,聽日係跨越同工Chris的大日子,其實我而家就應該即刻去開工整咭...
這又令我想起一直說想把我的手作咭仔擺上黎,今個星期搵時間做啦,各位密切留意哦!

Friday, June 10, 2005

hm....

我發現Larry Campbell驚世大陰謀論!!請參閱下面個post既discussion,我想聽下你地各位有咩意見。

Thursday, June 09, 2005

大麻合法化,合法嗎?

第一天以記者的身份參加溫市市長的新聞發報會,興奮!
一來發報會議題具爭議性,二來第一次嘛,逼逼下,周圍望望下,呵,原來是這樣的...

繼安全注射屋,市長Larry Campbell家陣力撐大麻合法化,佢話大麻合法化之後,老師同學校輔導員先可以更有效教導學生毒品禍害。大佬,咩邏輯呀?如果所有野要合法化先可以正確教導仲得了?!甘不如順便將海洛英冰毒搖頭丸一次過合法化埋啦,咪等D學生哥淨係可以正確學習大麻,甘對其他毒品好唔公平窩!

阿市長仲話大麻合法可以更有效監管,杜絕非法種植場,可以減少政府"衿檔"開支,並且由政府以liquor store形式合法售賣大麻,可以增加庫房收入,再用於預防工作上。其實換句說話講,佢想壟斷市場,尤其美國吸食同擁有大麻都係犯法,呢個市場大成甘,邊個唔想分一杯羹?!
首先,政府將會令人上癮既毒品合法化已經講唔通,然後所謂既控制市場只不過係唔想俾人分左舊肥肉。再者,將大麻合法化只會發出錯誤信息,話俾D人聽,吸大麻無罪架,no big deal,立下甘既根基,就算你花再多錢做教育既工作都係徙氣!

等同要教一個小朋友唔好食飯前食零食,但係你擺到成屋都係,然後又同佢講食左阿媽都唔會罰你,唔會鬧你又唔會打你,一D阻嚇作用都冇,究竟想點?

阿市長話,等同酒精,青年人試過大麻,發覺no big deal, i m out of it,就唔會造成問題。
但問題就係,點解下下都要等D年青人以身犯險之後先自己學識what is not a big deal?
很多人開始接觸毒品也是因為他們生命中有一塊半塊(甚至更多)的空缺,誤以為毒品可以為他們提供答案。在這樣一個大前題下,如果到處有售會令人上癮的大麻,要叫這群有點煩惱又有點迷失的年青人如何有能力判斷大麻到底係big deal or not?!

家陣食下零食唔會死人,但係吸大麻會上癮,會損害腦神經,唔係講笑。到有一日佢地發現Marijuana is a big deal, but i can't get myself out of it的時候,要做補救的行動,又談何容易。

預防濫用藥物,重點不是毒品合法不合法,而是教育和輔導,讓他們知道大麻,酒精,毒品,逃避,通通不「合法」。栽培年青人正視困難,愛惜生命才最值得社會長遠投資。

Wednesday, June 08, 2005

cool (還能有更差的title嗎?!)

昨天晚上花了點時間把這個blog裡的日記重讀一遍,停在"反省"這個字上最多最長。
只會說,之後不做,白反省。
所以鼓起了不知從何而來的勇氣和一個疏遠了兩年的朋友在ICQ上開始對話。
最近點呀?你老細講起你呀!突破conference正唔正呀?
嘩!咩叫隔膜?突然以為世界上冇呢樣野。我自己都嚇一跳。
然後接近尾聲,彼岸傳來一句:sorry for hurting you。
怎麼說呢...背了兩年的一個包袱突然被輕飄飄的提了起來,說不出的輕省。
是真正的experiencial learning.

Tuesday, June 07, 2005

做記者的第四天

原本想從"做電台新聞記者的第一天"開始寫起,但我發現有些感受必需經過沈澱才能表達。
上班的第一天,知道的少,學到的不多,但看到很多。
不知道做記者對你們來說是甚麼一回事呢?是前線?是衝,搶,快,搏,準?
做了四天記者,我發現以上的種種很重要,但更寶貴的是對這個世界有愛和關壞。其實每天通過新聞總處傳給我們newsdesk的新聞稿多不勝數,能讓聽眾聽進耳裡的,只有不到百份之二十吧?!其餘剩下的不值得大家留意,不值得大家知道嗎?這是由誰決定呢?
我開始發現,傳媒工作並不是消息發放,而是選擇性發放消息。

緊貼新聞消息不一定等於關心世界,要真正學會關心世界必需由懂得解構傳媒開始。
這是我做了四天記者的學習。