since we came back

從溫哥華回來之後又迷上pupe,仲未知係咩就嚟睇吓啦，好得意好好玩架~
(由於介紹人玩係有得獎嘅，所以如果你有興趣玩,話我聽我invite你啦~)

*******************

放假之前去過連卡彿嘅Benefit counter買concealer，個sales姐姐好好態度，唔hardsell而且笑容靚靚，結果佢介紹咗另外兩樣產品我都好樂意買下，仲book埋時間試個眼妝。今日再返去，遇上另外兩個sales，一個仲要係manager，但係笑容欠奉不特只，仲要係慢手慢腳兼黑口黑面，想點呀?!?!?! 好明顯係趕客啦~
原本以為美國牌子化妝品喺香港設counter會沿用美式friendly嘅customer service，看來是空歡喜一場...

*******************

放完假復工一個星期，so far都可以控制到喺7點左右收工，但係下個星期有幾個死線逼近，希望情況不至太糟就好... 少做個節目，壓力即時鬆咗好多，對工作的enjoy程度也即時跳升100度，再加上有阿Jan的「早晨!」(有好幾個早上都係佢主動同我講早晨哦!係真架，唔係幻覺哦!) 返6點都係人間美事啦~~

*******************

差d唔記得寫....我把聲同阿jan把聲錄咗個promo呀, 其實係分開錄嘅 (真係共處一個錄音室我想我會暈咗錄唔到...) german叫我單收完再搵阿Jan錄，雖然有(好衰的)同事話german無人好搵先搵我錄...但係我唔理得咁多啦，(就算真係如此，都啱數嘅，我邊度夠班吖...) 總之呢個係one of my best memories at CR so far 啦~~ (中英不分...好明顯神智開始不清~)
我好有大志架，我要好好練好把聲學VO，有朝一日可以同阿Jan一齊錄一個真正一齊錄嘅PROMO~~

是宿命還是犯賤?

怎麼每次都臨上機先來趕死線，一定要搞到自己無覺好瞓像條死屍??

２：４５am．．．
我站在printer前面，眼濛濛在找萬字夾的時候，夜鬼阿哩行過只有我一人的一台辦公室，向我說了句話~

咁夜都未走呀？
係呀，聽日放假，要做埋d嘢先囉
哦，係呀（跟手走咗）

５分鐘後．．．
突然好像聽到，佢其實係問我飲唔飲嘢呀?
我是白痴嗎？！

２個鐘頭之前會扭氣球的（必需強調！！）同事仔些云在msn叮囑我：唔好做咁夜喇，你個腦會唔清醒架．．．

原來係真嘅！

好喇，做好喇，聽埋最後一集天大地大嘅錄音，可以安心上機
好多謝有”聽眾”朋友搵到上門的留言，多謝你們支持，與其說是聽眾，我其實都當你們是朋友.
因為這是自家blog，有咩唔怕講．

其實係因為漸漸有點迷失，不知道自己到底在做一個甚麼節目，很討厭這種沒有目標，只不斷發空拳的感覺，無著力點，很浮．出拳也不敢用力，怕會失去重心仆崩鼻．結果這種無自信的表演通通反映在節目裡，會令人聽到窒息．
我知道我需要一個breakthrough，我會努力去找．
說實在的，我有想過放棄，而且有很認真的在想．
但我還是走不掉．．．．

是宿命　也是犯賤

哈哈～～



*******

mui, & vanc的朋友仔，見面再談～～～

最近...

• 一直在想，如果我咩都唔做哩埋喺屋企，會有幾多人鬧我頹廢呢?


• 對前途有點不清楚，不知道要往哪個方向走，這樣很不濟嗎?


• 常說，人生不如意事十常八九，但若每天真以這個比例活著，怎會不想死?


• 好想追返d日文，無啦啦想讀書，應該係壓力太大，或者shot咗...


• 看日劇《冗談じぁない》看著野田妹很幸福小女人的模樣，就完全不相信她是les的傳言...
  
• 然後驚訝於自己原來很八婆!
  
• 覺得自己很懦弱，有很多不滿都講不出口
  
• 發現生活空間很重要，但為何重要，卻說不上來
  
• 坐上樓時 望著鏡 問自己，為甚麼身邊有人這麼錫我對我這麼好? 我值得麼?
  
• 好想找幾個女人仔出嚟傾好多好多計...

等我po吓相先~~

concert的舞台扑士林兔。1/6祈求大合唱之後漏夜搬到商台大堂，第一天有6隻。我呢d傻婆仲唔一早去影咩~

之後離奇的事開始發生，林兔續日消失，一家六口今早只剩下最細一隻~~沒人知道兔兔去了何處，同事們只知道有兔就快d去拍照!

同事j生日，我們三個日光日白去吃西餐開白酒，很是寫意!

相中兩位靚女都是公司裡難得啱傾的同事，雖然知道一起共事的時間不會很長，畢竟人各有志，而且這種工作環境要待得久，還得要有些特異功能!

但無論將來的路如何，很希望這些友誼能持續下去。到了這個年紀，認識新朋友已然不易，由同事變朋友更難，而且能說真心話的，有耐性、有悟性去了解彼此，不是天掉下來的恩賜是甚麼? !(會來看這個blog的人，多多少少都知道我的個性有幾難搞...)

(帽子很cute，但不是我的，感謝泰山借出拍照道具! 場景是一台辦公室)

有在這裡po過這張狂迷簽名嗎? 這是阿Jan talkshow part1之後，跟他在電梯獨處(!)時問他要的，他說可以到我的座位幫我簽~~~很好人呀~~又問我要寫咩名，我話寫傻婆啦，佢就笑咗一吓~~~呵呵呵~~~我tum到佢笑呀!!!!竟然!!!! (開始失心瘋....)

zoom埋 D D...

我不想做石頭

兩個星期的十點更話咁快就完喇，過埋呢個weekend就回復6點返工的日子。
雖然有點灰，但唔緊要，星期四有阿jan talk show part 2~~~好嘢!!!
返6點，就算乖乖10點上床瞓都一定唔夠瞓；但係返10點，放得工嚟餐晚飯又變咗宵夜，極唔健康，呢種咁嘅生活方式，實在唔係捱得好耐，前幾日驚訝發現我嘅生理年齡已達45歲....(汗) 點算好？！點算好？！

手上有幾個project，都是些有趣的題目，若我可以專心點工作，應該可以學到很多嘢...
最難的，不是工作本身，而是如何閉上眼不理那些無聊的人事，硬衝過去，不跌倒，也不絆倒人？

生日．．．過了大半個月後

今年生日一大清早被人激到雙眼反白，氣到面紅耳熱，差點就要當場昏倒！完全沒有預計到生日也會遇到這種事，讓我心情難過了大半天！ 上個星期schedule總算回復正常一點點，趁生日，早點下班(返5am，放6pm已經算很早...)，能回家睡個午覺就覺得是難得的生日大禮了！ 莫國王帶我去吃過晚飯，到7仔買個番石榴軟雪糕就是我的生日慶祝活動。很平淡很普通的一天，跟平常任何一天都沒有太大分別 (除了晚飯吃得豪一點之外)，這就是我和莫國王平平淡淡的婚姻生活。 不用對比四川災情的報導，我也知道，有這樣的生活，自己已是幸福的一群。


p.s. 下面有一篇記於２月尾阿Jan求其大合唱Part 1後....之前唔記得post出嚟，想睇請scroll落去....

5am

這個星期起地獄一樣的上班時間...4點不到就要起床...
就趁現在夜深人靜來留個字，證明給自己看，我也是個很勤奮的好員工！
雖然一天到晚有很多令人氣結的事發生，但這些高高低低正好是我成長的憑據，要好好記住。

合照

( 他開口笑!而且笑容很自然呢~)

星期四的press con，是我第一次和偶像合照...恨了很多年...原來發生的時候真的像發夢一樣...現在想起來也很夢幻~

他和平常一樣, 就是很型很型....我像個小fans(不是像...根本就是嘛!)，心跳加速，笑容僵硬，雙目out fo，而且又不敢靠得太近...

拍的時候，小濤一直大叫「攬住啦~~」害我怕得面紅耳熱，也搞不清楚他是叫我攬還是叫阿Jan攬...我真夠白痴!拍完後，阿Jan說「我們公司能屹立到今天，就是因為從來沒有人搞男女關係！」(笑)

阿Jan又會離開晴朗一段時間去準備talk show part 2，現在我有了這個合照作為提神之用，應該可以頂到在紅館再見吧~

這是月刊?!

好久沒來寫了，趁今天補假，在家有時間， 趕快來寫一下。
雖然說是清明補假，但我沒有去掃墓，反而一早起床就開始寫寫寫...
結果放假還不是為了有更多時間工作，實在諷刺得很！

這星期都在埋頭寫子夜場的劇本，一個有關遺忘和忘不了的故事，女主角是關心妍。5集的子夜場廣播劇，和阿Ming、杜光庭和寫，我負責女主角的獨白部份。下星期出街，請多多捧場~

5月初會去一趟高雄，參加Lynn和Jack的婚禮。剛剛訂好機票和酒店，有1.25天的自由時間；雖然少得可憐，但正因如此，才要好好計劃一下，朋友們，有甚麼好介紹？！

回覆留言....

(今天變身做一下留言版)

fasalo,
謝謝你的支持。*^_^* Rita Calypso的歌聲真的很好聽，我一聽就愛上了~
我在節目中介紹的唱片叫Apoclypso, 是她第一張專輯。我試著在香港找，但一直未見，若你想買，可能要在網上買吧~
至於881903.com的《天大地大》版面，暫時未有留言版，但過多一陣子就會有改革，可以多點和聽眾互動，要密切留意喔~

天大地大

連續好多日諗諗諗dup dup dup砌砌砌....
創作的過程真的很孤單，但想得通就會有份難以言喻嘅興奮。呢個星期將全副精神投放喺個節目度，度完又拆；拆完再砌....不斷推倒重來，終於得出現在的樣子。
當然改了這許多次也不等於現在的樣子就是最好(創作就係咁衰，永遠無最好)，但第一集，我自覺是滿意了，做到我手寫我心就已經很好。希望聽眾都聽得出我是誰。
很感謝阿Ming在節目名字和網頁文稿上幫咗我一大把，好似為我煲湯落咗鹽一樣。想知道係咩，click入嚟幫襯吓聽吓la~~

求其la～～

原本中午還是病得頭暈暈, 鼻涕一直沒停過, 沒食慾, 一坐下來就睡得著。

踏入紅館一刻仍然有點點呆, 機動式排隊逼埋去買百達通繩&CD, 逼逼逼...好逼。

好不容易找到剛放工趕來的莫國王, 手拖手入場。都話, 醜婦終需見家翁~ (果然不清醒!)

神奇的事發生了, 音樂一響起, 熱血沸騰, 連自己病都唔記得喇~~~

盡情享受阿Jan150分鐘出盡力的精彩演出, 講 唱 笑 跳 演 扮 嗌~

穿著魚網top的大大隻靚仔jan走近台邊唱, 小fans們一湧而上, 又叫又拍手, 阿jan望呢邊呀~~

然後小fans的生命線就在那一刻和大偶像的生命線相遇, 心靈相通, 共同經歷了對望的那一秒鐘! (oh~~暈咗~)

live show就是有這種魔力, 做的人出力, 看的人也出力, 做的人就更出力, 營造出一種超級高溫!

海峰talk show

明天開show，祝成功~~好好笑~~紀念品好好賣~~yeah~~
快d放完假返返黎晴朗~~快d快d~~

拆開哂d盒，搵返集噴飯dvd出來睇，重溫一吓舞台上郁郁吓嘅海峰，為明晚嘅見面做好準備，好緊張呀~小fans帶埋莫國王去睇海峰，醜婦終需見家翁嘛！(開始short short地 ~_~)

前兩日，有個同事打電話黎，話想關心吓我買唔買到阿jan飛，又係咁講阿jan真係好受歡迎呀，個show好爆呀咁，係咁講無dead air，講咗2, 3分鐘之後，我就覺得有d唔對路....原來係錄音！超低能....
想聽吓有幾低能，去聽吓881嘅「成班嘩鬼巴巴閉」啦~ (24/2, last part)

nodame zzz

多謝阿哈從溫哥華越過重重障礙，帶來型仔千秋王子和可愛爆燈的nodame SP，讓我可以在四天農曆年假期止止日劇癮! 當然唔少得要多謝提供節目的a君啦~a君這種源頭人物的真正身份就不便透露了~~嘻嘻
千秋王子怎麼瘦了這麼多?!看得人好不心疼呀~~野田妹還是一般可愛，今集挽個音符袋，比上一集成熟了點點，在實現夢想的路上，實實在在地掙扎過，迷茫過。這種劇集很好看。

*****

這幾天病了，公司通風不好，鼻水流個不停，頭痛得緊要，吃了藥沒好得了多少，好想睡....一直睡....一直睡....zzz
但是，現實係另一個有病的同事，手持一張兩日假醫生紙，但她竟說唔想放因為唔想擺低d嘢唔做走去休息...我俾佢吹漲！
好啦，好啦，咁即係我有假紙都唔放得啦...
zzz....

比比

香港同溫哥華嘅生活有好大唔同，呢句同阿媽係女人無咩分別。
今日睇返以前D相，好多都係同朋友影嘅，以前會有好多時間同朋友相處，會傾好多嘢，又會一齊搞好多活動。我諗返轉頭，可能因為咁，所以會有咁多不和，有咁多睇唔過眼。
因為有expectations,所以會失望。
離開遠咗，多返d距離，反而負擔無咁大。

人同人之間嘅感情好奇怪，走得太近，會好容易諗得太多，然後好驚做得唔夠。朋友生日唔記得、無送禮物，我會覺得有所虧欠。
好希望可以替朋友分享喜怒哀樂，但當別人不明白自己的時候，我會很難過；被朋友誤會，又會哭得死去活來。

說真的，這樣很幼稚。這不是友誼，只是自我伸延。

離開原來係一個幾好嘅過濾器，過濾自己。

錯失太易

我和莫國王晚飯通常在銅鑼灣吃，平貴都有，而且近家，吃完走路回去順便當散步，可以減肚腩~^^

今天吃了日式咖哩，味道不錯，而且餐廳裝修靚，menu又多選擇，值得再去! 但由於放工後太餓，菜一端上，我只顧著吃，吃飽了，又太累兼趕著回家看野蠻奶奶，所以餐廳名給忘記了...下次再去，定要拍拍照!

昨晚和10個小學同學仔聚頭，吃吃晚飯聊聊天，過了很愉快的兩小時。小時候跟我鬧不和的同學仔pauline從LA回來香港探朋友，上次跟她見面已經是8年前的事了!時間竟然過得這麼快!很嚇人!當然，長這麼大就不會再為小時候的嫌隙生大家的氣，反而看著她成熟了不少的臉，仍會覺得很親切~

希望她離開前，能有機會好好聊聊天.
一等又唔知要等幾耐....唔好等，而家即刻打俾佢~

睇睇

喺公司成日會見到藝員明星/人，有些架著大墨鏡的，不一定擺架子；相反有些名氣不大的，鼻卻很大。
上鏡普普通通的，真人原來很charm；滿以為是很靚仔靚女的，卻.......cheerrr....

JAN

3天後突然沈澱到神經線上來。 望著office枱頭的阿Jan剪報， 想起上星期五的一幕：我把生日咭遞過去,他有點驚奇, 接過一看, 再看著我說一聲多謝。所有加起來不過幾秒鐘的事。就在這幾秒之間, 我的臉紅得像蕃茄...不懂正常反應(注意：整件事根本就不正常...)呆呆的走開了。
多天來也不敢回想細節，因為怕它像夢,越去想, 會越難記起。


這個星期開始，海峰準備standup要閉關，不再時時見到，雖然有點失落，但說真的，工作時少點分心，效率果然提升不少! *^_^*

這幾天會陸續update返呢幾個星期發生嘅事, 各位朋友 有時間留個言啦~

我算甚麼 祢竟顧念我

天天做到最後一口氣才離開office，但上床睡覺那一刻，還是會覺得很滿足。原來天天在做喜歡的事情，真係會咁開心。

還記得第一次聽阿ming寫的廣播劇，眼雖看不見，單憑聲音已叫我感動不已。聽完後，心抽住抽住。

這個聖誕，我有份錄阿ming寫的廣播劇，錄promo的時候，阿ming很詳細地講解角色的背景，教我入戲，錄了一次又一次，阿ming都沒有jip過一聲，沒有秒過一眼。能有這個機會，除了感恩，還是感恩。

promo出街，收音機傳來那把vo的聲音，是我覺得最好聽的其中一把女聲。何Lily(同事都稱呼她叉姐)唸出「鄧蕙茵飾演羗皓」，聽著，感覺像做夢。

今天做出澳門特輯的demo，email給叉姐，下午就收到她的電話，給了很多具體的意見。這麼多年來，一直恨的，就是這樣的老師這樣的教導。終於在商台找到。

我算甚麼 祢竟顧念我

來龍去脈

做做下嘢，見到阿Jan行入去我地監製grace間房，在紙上寫寫寫，30秒之後就離開了。我問旁邊的同事，阿Jan來做甚麼？她側側頭說不知道。
5分鐘之後，監製grace返來...

咿，咩嚟架?
哦，阿伯d稿囉!
真架?
真架!我地要keep返d記錄，佢用手寫，所以會交低d 稿，你係唔係想要?
得咩?
攞去影印啦，不過唔好咁揚喎!
真係得?!多謝!

我一本正經咁去影印，影完唸住俾返份正本俾監製...

你要份真架啦!
真係得?
keep record之嘛，影印本得架啦，你攞去啦!

*^_^*
我會珍而重之，好好對佢。